Polis ug kaubanan nga mi-pickup sa negosyanteng namatay gikasohan

CEBU, Philippines - Gipasakaan na og kasong homicide kadtong pulis ug tulo ka mga kauban gitumbok nga responsable pagkamatay sa usa ka drug dependent nga ila untang dad-on sa drug rehabilitation center kaniadtong Bag-ong Tuig.

Ang kaso didto gipasaka sa Cebu Provincial Prosecutor Office batok ni SPO2 Jonas Paquibot nga gibasol sa pagkamatay ni Jerome Bendebel, 42, nga taga Balamban.

Si Chief Insp. Rene Kyamko sa PNP Criminal Investigation and Detection Group (CIDG)-7 miila sa laing gipasakaan og kaso nga sila si Edwin Jakosalem, taga Purok 8, Barangay Camputhaw, dakbayan sa Sugbo; ug duha ka wala pa mailhing mga kauban.

Base sa affidavit ni Leony, asawa sa biktima, nga ang iyang bana namatay niadtong Enero 1 didto sa tambalanan human kini dad-a sa “personnel” sa usa ka rehabilitation center sa Barangay Lahug.

Sa wala pa ang insidente, matud ni Leony nga ang maguwang babaye sa iyang bana misugyot nga ipasulod sa rehabilitation center ang iyang bana, iyang gisugyot nga unya na lang unta liwas sa Bag-ong Tuig.

Matud ni Leony nga niadtong Disyembre 31 sa gabii samtang nagpaabot sila sa Bag-ong Tuig niabot ang iyang bana nga adunay dala nga armas.

Tungod sa iyang kahadlok mitago si Leony ug ang iyang mga anak sa usa ka kwarto sa balay sa iyang ginikanan samtang diha pa ang iyang bana.

Gitawgan ni Leony ang rehabilitation center aron ma-pick-up na ang iyang bana ug gidala kini.

Matud pa nga miabot si Bendebel sa rehabilitation center kaadlawon na sa Enero 1 ug nabantayan ni Rey Abella nga maoy night shift manager nga dunay lama sa dugo ang ulo sa biktima ug nang        luspad.

Nasayran nga gidala dayun sa ospital ang biktima sa grupo ni Paquibot ug Abella apan namatay kini bisan gitabang na sa mga doktor tungod sa daghang bun-og sa kalawasan.( /EIM)(BANAT NEWS)