Kawatan nadakpan tungod sa pagputak sa mga manok

CEBU, Philippines - Gumikan sa pagpunay og putak sa mahalong manok hiniktan usa ka gipasanginlang kawatan ang nadakpan diha sa barangay Tawason, dakbayan sa Mandaue.

Gibalhog sa prisohan si Reybandel Tito Fernan, 27,  taga dalan Katipunan, barangay Labangon, dakbayan sa Sugbo, human nasugatan sa mga polis.

Usa ka Alex Dalid Gamorot, 53, ug Marlon Sinelong, 38, pulos mga residente sa maong barangay ang miangkong tag-iya sa duha ka manok nga nagkantidad og P2,500 matag usa.

Matud pa nga ang mga residente nakamata sa pagsige og putak sa mga manok ug ilang nadiskubrehan nga gikawatan na sila og mga hiniktan hinungdan nga ilang gipangita sa palibot ang kawatan.

Si PO3 Arnold Villacampo sa kapolisan sa Presinto 6 nga nahinabi sa Banat News miingon nga samtang sila nagpatrolya sa maong dapit ilang nasigpatan ang maong suspetsado nga naglakaw ug nagpas-an og dakong bag.

Apan nahibulong sila nga dunay nagsige og putak-putak diha sa maong bag hinungdan nga ilaha kining gisita ug nabantayan nga nagkanga-kanga kini pagtubag hinungdan nga ila kining gidala sa presinto.

Didto sa presinto na naapsan sa mga tawo ang suspek ug didto ilang giila ang maong mga manok. Nasuta usab nga duna pay daghang mga manok nga gipangawat sa nanglabay’ng mga adlaw  sa maong barangay apan wa pa matino kung si Gamorot ba maoy nangawat niini.  (BANAT NEWS)