Namaligya og Chinese medicines sa aseras gidakop sa kapolisan

CEBU, Philippines - Nasikop sa mga sakop sa Waterfront Police Station ang upat ka tawo human giingong namaligya og mga kadudahang Chinese medicines tungod kay wala sila makapakita og papeles sa maong tambal.

Ang nasikop naila nga si Wilma Tague Hepiga, 32, Rosevelt Sudiza Cantiga, 27,  Nicanor Permites, 34, Alphy Arcilla Largo, 25, ang upat molupyo sa dakbayan sa Pagadian City.

Matud pa nga nasikop ang mga suspetado sa Osmeña Boulevard ug F. Gonzales samtang namaligya sa maong mga tambal.

Nakompiskar sa kapolisan ang usa ka kahon sa liver oil capsule, unom ka kahon nga may sulod nga mga Chinese medicines. Dihang gipangitaan og mga permit sama sa pagtugot  gikan sa Board of Pharmacy nga sila legal nga makapamaligya sa maong mga tambal ug food supplements, wala makapakita.

Kasamtangang natanggong ang mga suspetsado sa Waterfront Police Station samtang giandam pa ang kaso nga ipasaka batok kanila.

Samtang nasikop sa kapolisan sa San Nicolas Police Station sa usa ka checkpoint sa Forbes Bridge sa dalan Tupas, barangay Pasil sa dakbayan sa Subgo ang usa ka lalaki nga nagdala og 400 ka stick sa marijuana.

Sumala pa ni SPO4 Reynaldo Origenes nga  nadakpan sa grupo sa ilang hepe nga si Sr. Insp. Chuck Barandog   ang suspek nga si Gerald Baguio. Kasong kalapasan sa Sec. 11 Art. 2 sa RA 9165 o Comprehensive Dangerous Drugs Act of 2002 ang ipasaka batok kaniya. (/EIM)(BANAT NEWS)