Taxi ug bus operators gidasig sa kapolisan batok krimen

CEBU, Philippines - Gitagbo kagahapong adlawa sa kadagkoan sa Police Regional Office 7 ang mga taxi ug bus operators agi og pagpalig-on sa seguridad sa Sinulog. Si Senior Supt. Mariano Natu-el Jr., personnel division chief of Police Regional Office (PRO-7) miingon nga nagpakitabang sila sa mga operators sa taxi ug sa mga bus tungod sa ka-importante sa ilang papel sa sinulog.

“Gipangayo namo ang ilang cooperation ug tabang sa pag-inform sa kapolisan in case dunay persons nga mosakay sa ilang taxi ug buses,” matud ni Natuel.

Matud ni Natuel nga manghatag sila og stickers nga may numero sa police diin ila kining ma-kontak kun duna silay masigpatan nga krimen sa dalan o duna bay mosakay nila nga mga kadudahang tawo.

Si Richard Cabucos, presidente sa Metro Taxi Operators Association miingon nga andam sila nga motabang sa kapolisan tungod kay kun duna silay yangungo sa kapolisan ila man usab gi-aksyonan.

Matud ni Cabucos nga sukad nga nagpahigayon og checkpoints ang kapolisan sa dakbayan mi-menos ang insidente sa pagpanulis sa mga drayber sa taxi.

Dugang ni Cabucos nga ilang gipahimangnoan ang mga drayber sa taxi nga dili gyud mamili og pasahero atol sa Sinulog ug dili mopahimulos sa mga pasahero pinaagi sa pagpangayo og mahal nga plete.

Sumala pa ni Cabucos nga gipahinumduman nila pirme nga ang seguridad sa pasahero ug sa drayber ang angay huna-hunaon sa mga drayber.

Matud pa nga ilang gi-train ang ilang mga drayber kalabot sa safety ug safe driving.

“Apil na ang safety, safe driving kinahanglan kay kun dili pati silang driver patay,” dugang ni Cabucos.

Mitambong sab sa maong meeting si Julie Flores, presidente sa Cebu South Mini-Bus Operators Association ug si  Richard Corominas, Cebu South Bus Operators Association nga mipasalig sa ilang 100% nga suporta. (/EIM)(BANAT NEWS)