Mipatay sa kanhi kauban sa Crips priso na

CEBU, Philippines - Ang kasong murder maoy gipasaka sa kapolisan  batok sa   suspetsado  nga  mipusil patay sa usa  ka kanhi  nila  kauban didto  sa barangay Pulpogan , lungsod  sa Consolacion niadtong bispiras sa Pasko.

Si PO3 Socrates Borinaga sa kapolisan sa maong lungsod miila sa duha ka suspetsado nga  mao sila si Danny Mar Navarro, alyas Bills, 22 ug Harold  Sasing, 23 , nga pulos sakop sa Crips gang nga nagpuyo sa barangay Nangka sa nahisgotang lungsod.

Matud pa ni PO3 Borinaga nga ang duha maoy giila sa mga saksi nga maoy nagpusil patay kang Reymar Racasa Dova, 19, nga nagpuyo sa maong dapit ug kanhi usab sakop sa Crips gang.

Si PO3 Borinaga miingon nga ang  biktima mibiya sa Crips gang.

Gihangyo  kini  sa duha  nga  pabalikon  sa  maong  grupo apan  tungod  sa iyang  pagdumili, gituohan  nga  maoy hinungdan  nga kini  gipatay.

Si PO1 Albert Jiminez nga nahinabi sa Banat News miingon nga sa wala pa  pusila  ang  biktima, nakig-estorya  pa kini  sa  iyang  tulo ka mga higala nga sila si Bryan, Jesse ug Michael nga nanglingkod sa sulod sa multicab nga nag-parking sa maong dapit.

Matud pa ni PO1 Jiminez nga  miabot ang duha ka mga suspetsado nga nagsakay og motorsiklo nga mihunong tungod gayud sa nag-parking nga multicab .

Si Navarro nga maoy nag-angkas kalit kining milanit  sa iyang armas dayong pusil sa dughan ug paa sa  biktima nga nakaingon sa hinanaling kamatayon niini.

Ang duha ka mga suspetsado  positibong giila sa mga nakasaksi  ug nadakpan  usab  dayon  sa follow up operation sa kapolisan .

Sa pagkakaron tataw  kaayo  nga  anha  kini  mosugat  sa bag-ong tuig sa prisohan. (/WC)(BANAT NEWS)