Way girekomendar nga piyansa sa mipatay sa iyang inahan
CEBU, Philippines - Walay girekomendar nga piyansa alang sa naprisong anak kinsa gipasanginlang mitagud-tagod patay sa iyang kaugalingong inahan sa lalawigan sa Bohol.
Si Eldrid Torreliza, 33, lumad nga taga Bohol, nagsugat sa iyang asawa ug anak sa pantalan sa Pasil, dakbayan sa Sugbo nga gikan sa Bohol aron magkuyog unta sila pagsaulog sa Bag-ong Tuig dinhi sa dakbayan sa Sugbo sa miaging buntag.
“Paita ani oi, nisugat gani ko sa akong pamilya kay mag kuyog mi sa new year, nadakpan naman hinuon ni,†matud ni Torreliza nga nagbagulbol.
Nasikop si Torreliza sa mga sakop sa Investigation and Detective Management Branch (IDMB) pinasikad sa warrant of arrest nga giluwat ni Regional Trial Court (RTC) Judge Marivic Dakay sa kasong parricide. Wa usab tugoti nga makapyansa si Torreliza ni Judge Dakay.
Ang hepe sa IDMB Chief Inspector Aileen Recla miingon nga ang ilang nadakpan mao ang suspetsado sa pagpatay sa iyang inahan nga si Leonila sa barangay Poblacion sa lungsod sa Getafe sa Bohol sa miaging tuig.
“Gitagud-tagod ug gisud daw sa sakoâ€, matud pa ni Recla.
Sumala pa ni Recla nga gipanid-an na nila ang suspetsado sulod sa duha ka semana human sila makadawat og taho nga dinhi ra magtago-tago ang suspetsado.
Gawas sa iyang pagka-wanted sa Bohol, nasayran sa kapolisan nga nalambigit usab kini sa pagpamaligya og illegal nga drugas dinhi sa Sugbo.
Wala hinuon mosukol sa kapolisan ang suspetsado dihang gidakop kini apan hugot niyang gihimakak nga siya ang mipatay sa iyang inahan. “Limpyo ang akong konsensya nga wa ko nagpatay sa akong mama,†sumala pa ni Torreliza. (BANAT NEWS)
- Latest
