Way foul play ang kamatayon ni Tapic

CEBU, Philippines - Walay foul play ang kamatayon sa usa ka tawo nga naglutaw  sa Mactan Channel  habig sa dakbayan sa Lapu-Lapu  sa gabii   nga bispiras sa Pasko. Kini ang nasayran sa Banat News kang PO2 Jersson Alparito sa homicide section sa kapolisan sa maong dakbayan nga nahinabi kagahapon base  sa resulta sa  autopsy sa patay’ng lawas niini.

Matud pa ni PO2 Alparito nga ang PhilHealth ID nga ilang nakuha gikan sa bulsa sa karsones sa maong patay’ng lawas nga nagdala sa ngalan nga Alfon Tajanlangit Tapic mao gayud ang tinuod nga ngalan sa namatay. Dugang pa niya nga gikompirmar sa asawa sa namatay nga miadto sa ilang buhatan ug maoy miila  sa iyang  bana .

Matud  pa  ni PO2 Alparito  nga giangkon sa asawa nga ang iyang bana  may  problema  kay  ang  amahan  niini nalandig  sa tambalanan  apan  walay kuwarta nga ibayad sa hospital.

Nagtuo ang  asawa nga naglangoylangoy   tingale  ang  iyang  bana  sa dagat  sa Mactan Channel sa pagpalabay sa oras ug ilang gituohan nga kalit lamang kining gibikogan ug walay nakatabang hinungdan nga nalumos.  (BANAT NEWS)