P26.8B gipangayo sa RDC ngadto sa NEDA tungod sa danyos sa duha ka katalagman

CEBU, Philippines - Giendosar sa Regional Development Council 7 ngadto sa National Economic Development Authority ang P26.8 bilyones nga balor sa plano pagpahibalik sa nagusbat sa niaging bagyong Yolanda sa Sugbo. Si Gob. Hilario Davide III miduso sa plano atol sa tigum sa RDC 7 kagahapon aron maendosar ngadto sa kaulohan.

Labing daku balor og P23.6 bilyones mao ang pagpabarug pagbalik sa mga pinuy-anan sa katawhan ug ang kabalhinan sa ubang molupyo nga anaa sa peligrong lugar.

Gipakita usab ni Davide ang danyos nga gibilin sa bagyo nga balor og P4 bilyones diin ang labing daku nga P1.7 bilyones gikan sa agrikultura ug grabeng naigo ang lungsod sa Bantayan sa amihanang bahin sa lalawigan sa Sugbo nga adunay P1.4 bilyones nga danyos. Ikaduhang labing daku nga nadaut balor og P1 bilyones mao ang panginabuhi sa katawhan.

Nalakip usab ang Sugbo sa giendosar sa RDC 7 nga plano sa pagpaayo sa naguba sa linog diin ang labing daku og kadaut mao ang lalawigan sa Bohol.

Ang Sugbo adunay balor nga P992 milyones nga gikinahanglan sa pagpaayo sa mga tunghaan samtang laing P510.8 milyones alang sa ubang pangpublikong buhatan.

Samtang nagkinahanglan usab ang Bohol og P80.7 milyones alang sa pagpaayo sa naguba sa bagyo, apan ang kadaut nga namugna sa linog niabot og P12.3 bilyones.

Gialuman nga pinaagi sa pag-endosar sa RDC sa plano, makakuha ang lokal nga kagamhanan og pondo gikan sa nasudnong kagamhanan.  (BANAT NEWS)