P2 mil cash assistance i-release ugma alang sa mga senior citizen

CEBU, Philippines - Dos mil pesos ra g’yud ang ipanghatag sa kagamhanan sa dakbayan sa Sugbo ngadto sa mata’g senior citizen ugmang adlawa (Sabado) tungod kay nagkuwang g’yud og kwarta ang City Hall alang sa mao nga gastohan.

Si City Administrator Jose Marie Poblete miawhag sa mga senior citizens nga mosayo sila pag-adto sa  ilang mga ka barangay halls o kaha sports complex sa tumong nga madali ra paghuman ang pagpang-apod-apod sa cash assistance.

Matud ni Poblete nga sa buntag ngadto sa udto ang pagpanghatag sa cash assistance adto ipahigayon sa mga barangay nga nahimutang sa north district, samtang ini’g kahapon ang pagpanghatag adto na usab sa mga barangay sa south.

Si City Treasurer Diwa Cuevas namahayag nga ilang paninguhaon nga ang nahabiling tag P2,000 nga cash assistance sa mata’g senior citizen para karong tuiga mahatag ngadto kanila unya sa ikaduha nga semana sa Enero.

 Si Mayor Michael Rama sayo pa mipahibalo nga ang pagpangapud-apod sa cash assistance ngadto sa mga senior citizens ipahigayon karong adlawa ug ugma apan matud ni Poblete nga giusab nila ang petsa. Dunay mga senior citizens nga miingon nga malipay gyud sila og maayo kun hutdan pa sila sa paghatag sa ilang tag P4,000 nga kuwang sa gisaad nga P10,000 nga kinatibuk-ang cash assistance karong tuiga. Sa sunod tuig, ang cash assistance sa matag senior citizens sa dakbayan moabot na og tag P12,000. (BANAT NEWS)