Bayong-bayong naligsan sa Ceres patay
CEBU, Philippines - Namatay ang usa ka 15-anyos nga bayong-bayong human kini ligsi sa Ceres bus didto sa barangay Lawaan II, dakbayan sa Talisay, niadtong Biyernes sa gabii.
Ang biktima mao si Charlo Balajada, taga barangay Biasong, dakbayan sa Talisay.
Ang drayber sa Ceres bus nga nagtangag sa plakang CEH-612 nga si Arnold Nicor Samillano, 34, taga barangay Cantumog, lungsod sa Carmen nagtingkagol karon sa Talisay City detention cell.
Sa imbestigasyon ni SPO1 Nestor Canlobo, ang bus nagbiyahe paingon sa habagatan ug pag-abot didto sa lugar nga nahitaboan aksidente niining naligsan ang biktima kinsa niadtong higayona mitabok sa karsada.
Si Balajada gidala ngadto sa Talisay City District Hospital sa Talisay Rescue Emergency Action Team (TREAT) apan patay na kining nahiabot didto.
Si Inspector Rogene Fodutan, hepe sa Traffic Section mibutyag sa Banat News kagahapon nga napusa ang ulo sa biktima human kini malatayi sa ligid sa bus.
Matud ni Fodutan nga wala dayon manaog ang drayber tungod kay nahadlok nga pasakitan unya sa mga estambay apan dihang miabot ang mobile patrol boluntaryo kining mitahan sa iyang kaugalingon ngadto sa mga polis.
Dugang ni Fodutan nga ang suspetsado mag-atubang og kasong reckless imprudence resulting to homicide. (BANAT NEWS)
- Latest
