Polis nga miresponde ug nakapatay sa tawong gikapinusilay, kasohan

CEBU, Philippines - Pasakaan og kasong homicide ang polis nga nakapusil sa usa ka lalaki nga gituohang nalisoan sa pangisip sa barangay Guba sa Lunes sa buntag.

Ang maong polis naila nga si SPO1 Rolando Tabal, nadestino sa Cebu City Public Safety Company nga na-assign sa detachment sa barangay Guba.

Sumala pa ni Chief Insp. Noli Cernio ang hepe sa Homicide Section nga pasakaan gyud nila og kaso ang maong polis.

“Bisan pa justified ang pagpatay liable gihapon ang polis,” matud pa ni Cernio.

Matud pa ni Cernio nga ang korte na ang modesisyon sa maong kaso apan miingon kini nga buotan ang maong polis ug unya retirable na kini.

Napusilan ni Tabal si Johnry Fermin, lumad nga taga-Bacolod, nagbantay ug handler sa usa ka farm sa manok sa barangay Guba.

Matud pa nga nag-wild si Fermin sa wala pa siya mapusili ni SPO1 Tabal.

Dihang mirespondi si Tabal gipaarakan siya ni Fermin ug dali kining mitago sa motor aron makapasalipod sa bala.

Sumala pa nga gipusil ni Fermin si Tabal gamit ang M-16 nga armalite rifle hinungdan nga mi-return fire ang maong polis hinungdan sa kamatayon niini.

Sumala pa sa imbestigasyon nga sa wala pa mahitabo ang pag-wild sa biktima upat na ka adlaw kini nga wala na mokaon. (/EIM)(BANAT NEWS)