Mga maestra may bonus gikan sa Mandaue City

CEBU, Philippines - Makadawat og P2,500 nga kantidad salapi  ang  2,000 ka mga magtutudlo sa  mga  public schools sa dakbayan sa Mandaue isip bonus gikan sa kagamhanan sa maong dakbayan karong tuiga.

Gipahibalo kini ni Mayor Jonas Cortes atol sa culmination program  sa Education Week  niadtong miaging adlaw nga gihimo sa Mandaue Cultural and Sports Complex sa sitio Tribunal sa barangay Centro.

Usa ka resolusyon ang gikatakdang ipalabang ni Konsehal Diosdado Suico sa Konseho aron gahinan og P4.8 milyones gikan sa panudlanan sa siyudad ang maong plano. Si Suico maoy chairman sa committee on budget.

Dugang pa ni Cortes nga lakip sa makadawat sa maong bonus ang mga non- teaching personnel sa Department of Education (DepEd) Mandaue City Division.

Ang maong kantidad nga gihatag nga bonus maoy tugbang sa kagamhanan sa gipahibalo usab ni Education Regional Director Carmelita Dulangon atol sa  iyang pagpamulong  nga madawat na nila ang P5,000 nga Productivity Enhancement Incentive (PEI) nga ihatag sa DepEd.

 "Isip pasalamat sa inyong contribution among tugbangan og katunga ang inyong madawat gikan sa national government," nagkanayon si Cortes sa iyang pamahayag.

Atol sa maong kalihokan maoy gihimo usab ang pagpasidungog sa 244 ka mga stakeholders ug mga magtutudlo alang sa ilang kontribusyon  sa paghatag og quality education sa kabataan diin 25 ka maestra ang nakadawat og P10,000 nga nakaserbisyo na sa dakbayan sulod na sa 25 ka tuig nga gidugayon. (BANAT NEWS)