Mga JO sa Talisay walay kasigurohan kung makadawat og bonus sa Pasko

CEBU, Philippines - Mga job order (JO) sa city hall sa dakbayan sa Talisay naglaom nga mahatagan og bonus sa kagamhanan sa siyudad apan dunay mga huhungihong nga mikatap posibleng wala sila’y madawat nga bonus karong Pasko. Sa milabay’ng mga tuig ang mga JO dunay nadawat nga mga bonus depende kung pila sila ka buwan nga nagserbisyo. Si Talisay City Budget Officer, Edgar Mabunay nga nahinabi sa mga tigbalita kagahapon nagkanayon nga walay balaod nga nagmando o nagpugos nga kinahanglang mohatag og bonus ang gobiyerno sa mga JO.

Matud niya nga ang pagpanghatag og bonus alang sa mga JO pagbuot na sa mayor apan kinahanglang ipasubay usab sa balaod ang pagpagawas og kwarta.

Gawas niini nagdepende usab kini kung dunay sobrang budget ang siyudad nga magamit nga ipanghatag nga bonus sa maong mga trabahante, sa pagkakaron gikwenta pa kung duna bay sobrang pundo ang siyudad alang niini.

Gipasabot usab sa city budget officer nga ang nadawat sa mga JO kaniadto ilaha kadtong salary adjustment nga gihatag atol sa buwan sa Disyembre.

Dugang ni Mabunay nga lisud usab kaayo ang paghatag usab karon og bonus tungod kay kasagaran kanila usa lang ka buwan ang kontrata.  (BANAT NEWS)