Evacuees gikan Leyte pabakunahan kontra leptospirosis sa Cebu City

CEBU, Philippines - Ang tanang mga bakwit gikan sa dakbayan sa Tacloban, Leyte nga ania karon sa dakbayan sa Sugbo hatagan og injection nga pang-alkontra sa sakit nga leptospirosis nga sagad makuha gikan sa ihi sa mga ilaga.

Matud ni Cebu City Health Officer Stella Ygoña nga peligro kaayo nga ang maong mga tawo nga nabiktima sa paglunop didto sa Tacloban nakasinati og sakit nga leptospirosis mao nga ila kining hatagan og libre nga injection.

Si Ygoña miingon nga ang mga bata nga anak sa mga bakwit kinsa anaa karon nag-estar sa lainlaing mga sports complex sa dakbayan sa Sugbo hatagan usab nila og mga bakuna alang sa hangga ug tipdas.Gatusan ka mga bakwit nga namiya sa ilang dapit sa dakbayan sa Tacloban ania karon giatiman sa mga tinugyanan sa Department of Social Welfare and Development (DSWD).

Ang mga opisyal sa DSWD dili motugot sa mga sakop sa media nga basta-basta nga mo-interview sa mga bakwit nga anaa gibutang sa mga sports complex sa lainlaing barangay.

Si Ygoña miingon nga katungdanan nila nga mga sakop sa City Health Department ang pag-atiman sa maong mga bakwit bisan og dili sila mga lumolupyo sa dakbayan sa Sugbo. (BANAT NEWS)