Mga engineers moboluntaryo sa pag-ayo sa mga nagusbat nga eskuylahan sa North

CEBU, Philippines - Ang kahugpongan sa Municipal and City Engineers Association of the Philippines (MCEAP) Cebu Chapter moboluntaryo sa pagserbisyo alang sa rehabilitasyon sa mga tunghaan ngadto sa amihanang bahin sa Sugbo nga maoy labing naapektohan sa bagyong Yolanda.

Si Talisay City Engineer, Audie Bacasmas kinsa maoy bise presidente sa MCEAP mibutyag sa Banat News nga nagpahigayon sila og emergency meeting kagahapon alang sa ilang tumong sa boluntaryong serbisyo sa rehabilitasyon sa mga tunghaan.

Matud ni Bacasmas nga ang habig sa amihanang sa Sugbo maoy grabeng apektado sa bagyong Yolanda hinungdan nga ang mga miyembro sa MCEAP sa habagatan ang buot moadto sa lugar aron mosusi sa mga tunghaan ug mokuha og mga detalye sa sitwasyon sa mga tunghaan alang sa assistance.

Gibutyag ni Bacasmas nga ang ilang presidente nga si Rodney Menchavez ang makig-coordinate ngadto sa kadagkuan sa Department of Education sa mao nilang plano.

Matud usab ni Bacasmas nga si Menchavez miawhag sa mga mayor sa kalungsuran ilabi na sa habagatan nga mohatag og pagtugot sa ilang mga municipal ug city engineers ug mga technical personnel nga makabisita ngadto sa mga lugar nga apektado.

Si Bacasmas nagkanayon nga kung ang DepEd makapamalit na og mga materyales alang sa mga nangagubang tunghaan ang mga sakop sa MCEAP andam kining mo-supervise sa pagtrabaho sa rehabilitasyon sa mga nagubang tunghaan.

Apan ang grupo nag-agad usab kini sa approval sa mga mayor sa mga kalungsoran ug siyudad

Gawas niini gihangyo usab sa grupo ang mga munisipalidad ug dakbayan nga magpadala og mga panday, mason ug technician ngadto sa mga apektadong lugar ug ang mga lokal nga kagamhanan mao nay moabaga sa mga sweldo sa nahisgutang mga skilled workers. Dugang ni Bacasmas nga gisentro sa ilang grupo ang mga nagubang tunghaan aron mabalik dayon ang mga klase ug ang mga bata duna usab dayon kini mapasilungan panahon sa ilang klase. (BANAT NEWS)