Duha ka tawo gipamusil sa Carcar City , usa ang patay

CEBU, Philippines - Usa ang patay samtang usa ang angol sa managlahing insidente sa pagpamusil sa dakbayan sa Carcar.

Patay diha-diha ang usa ka lalaki human kini tabangi pagpusil sa wala pa mailhing mga lalaki sa sitio Bonsai, barangay Bolinawan sa dakbayan sa Carcar sa alas 8:00 sa miaging gabii.

Ang biktima naila nga si Jundy Cañete, 32, may live-in partner, molupyo sa maong dapit kinsa nakaangkon og tulo ka samad pinusilan sa iyang lawas ug ulo nga nakaingon sa iyang hinanaling kamatayon.

Sumala pa nga gisulayan pa og dala sa Carcar Provincial Hospital ang biktima sa mga niresponde nga polis apan gideklarar na kini  nga dead on arrival.

Narekober sa kapolisan ang tulo ka kabhang sa kalibre .45 nga pistola ug ang usa ka cellphone sa crime scene.

Samtang naangol ang usa ka lalaki human kini naigo sa saag nga bala sa sitio Lupa, Barangay Buenavista sa dakbayan sa Carcar samtang nag-inom kini kauban sa iyang higala ug mga paryente.

Ang biktima nga nalandig sa tambalanan naila nga si Hermiano Sedon, 40, molupyo sa sitio Lupa, Barangay Buenavista sa dakbayan sa Carcar.

Base sa imbistigasyon sa kapolisan nag-inom ang biktima kuyog sa iyang mga higala ug paryente dihang nakadungog sila og buto sa armas ug kalit nga mitakingking si Sedon human may miigo sa iyang  walang tiil ug dihang gisusi naigo diay siya og bala.

Daling gidala ang biktima sa Carcar Provincial Hospital ug kasamtangang nagpaayo sa iyang samad. Samtang padayon pa ang imbistigasyon sa kapolisan sa pag-ila sa responsable sa maong duha ka pagpamusil.   (BANAT NEWS)