Way mihimulbol sa mga motor — TCPS Chief

CEBU, Philippines - Ang officer-in-charge sa Talisay City Police Station nga si Superintendent Resty Santos mihimakak kabahin sa report sa giingong pagpanghimulbol sa mga na-impound nga motorsiklo nga nahimutang karon diha sa impounding area sa kilid sa building sa Talisay City Police Station.

Niadtong Miyerkules si Santos misumitir kini og kopya sa iyang eksplinasyon ngadto kang Talisay City Councilor Danny Caballero kinsa maoy chairman sa committee on police. Kahinumduman nga human sa report nga giingong pagpanghimulbol sa mga motorsiklo niadtong Martes si Caballero mipalabang kini og resolusyon nga nag-awhag kang Santos sa pagsumitir og comprehensive report kabahin sa status sa nahisgutang motorsiklo kung ma-dispose ba kini pabor sa gobiyerno.

Sa iyang eksplinasyon si Santos nagkanayon kini nga sa iyang paglingkod isip OIC sa TCPS niadtong Hulyo 1, 2013 diha na sa storage area sa TCPS ang nahisgutang mga motorsiklo.

Matud usab niya nga ang mga motorsiklo nga masikop sa ilang checkpoints ug police operation pakuhaan niya kini og hulagway lakip na ang drayber niini ug isyuhan nila kini og Temporary Operator Permit (TOP) apan kung ang motorsiklo kinahanglan kining ma-impound ang traffic division na maoy temporaryong mokustodiya niini.

Matud ni Santos nga si PO2 Christopher Cesa, supply officer ug custodian sa PNCO gimanduan niya sa pag-imbentaryo sa tanang PNP property lakip na ang mga na-impound nga motorsiklo sa pagkuha sa mga chassis ug engine number niini ug isubmitir ngadto sa Land Transportation Office (LTO) aron mailhan ang mga tag-iya sa nahisgutang mga motorsiklo.

Niadtong Septiyembre 25, 2013 ang TCPS nakadawat kini og radio message gikan sa provincial headquarters nga nagmando sa pag-imbentaryo sa tanang mga nakompiska, gi-abandonar, gisurender o na-recover nga mga motorsiklo gikan niadtong buwan sa Enero hangtud sa Agosto niining tuiga ug lakip usab sa ipa-record ang chassis ug engine numbers.

Matud usab ni Santos nga tungod sa pagkapakyas ni Cesa sa pagtuman sa  mando girelibohan niya kini isip supply officer.

Sa maong pagkapakyas ni Cesa subay sa guidelines sa National Police Commission (NAPOLCOM) gimanduan niya kini nga mosumitir og eksplinasyon sulod sa 24-oras.

Niadtong Oktubre 25, 2013 si Cesa misumitir kini sa iyang eksplinasyon nga nagkanayon nga walay mga impounded nga motorsiklo nga gi-turn over ngadto kaniya sukad sa iyang pag-asumir isip supply PNCO.

Gipasabot usab ni Santos nga tungod sa pagkapakyas ni Cesa sa pag-account sa mga nahisgutang motorsiklo subay sa kamanduan sa higher headquarters mimando siya sa Field Training Program (FTP) police sa pagpahigayon og imbentaryo sa nahisgutang mga motorsiklo.

Giingong si Senior Inspector Al Pascual, deputy chief sa TCPS mi-instruct sa maong mga FTP sa pagsul-ob og mga civilian nga sinina tungod kay ang mga motorsiklong na-impound hugaw na kini tungod sa kadugay na niini diha sa impounding area ug ang mga FTP kinahanglan pang mokamang aron lang makuha ang mga engine ug chassis number.

Gihimakak ni Santos nga dunay nahitabong pagpanghimulbol sa mga na-impound nga motorsiklo diin matud niya nga wala mahilabti ang maong mga motorsiklo ug naa pa ang mga accessories ug spare parts niini.

Dugang ni Santos nga ang maong isyu gi-exaggerate lang kini ug na-misinterpret sa mga nakakita sa ilang gipahigayong imbentaryo sa mga motorsiklo ug ang iyang buhatan walay nadawat nga reklamo gikan sa mga tag-iya og motorsiklo nga nakustodiya sa ilang buhatan nga gihimulbulan kini. (BANAT NEWS)