Amahan mibaraw sa polis nga misikop sa iyang anak pasakaan og kaso

CEBU, Philippines - Kaso  nga obstruction of justice ang  atubangon  sa amahan ug igsoong babaye sa suspetsado sa pagpanunggab,  dihang  mibabag  kini  sa kapolisan nga midakop  unta  sa suspek  didto sa sitio Bunga sa barangay Agus sa dakbayan sa Lapulapu sa miaging  gabii.

Kini ang gipadayag ni PO2 Jesson Alparito sa homicide section sa dakbayan sa Lapulapu nga nahinabi sa Banat News  ug miila sa  naka-eskapong suspetsado  nga mao si Bryan Tamsi, 18, ulitawo, ug nagpuyo sa maong dapit.

Matud pa ni PO2 Alparito nga si Tamsi maoy suspetsado sa pagdunggab kang Jerevic Metchel, 21 , ulitawo ug silingan  sa suspetsado.

Dugang pa ni PO2 Alparito nga naglingkod  ang biktima sa gimaneho niining multicab alas 6:00 pasado  sa miaging gabii dihang giduol sa suspetsado ug kalit lang gidunggab ang  nawong  ug  ulo  niini.

Matud pa ni PO2 Alparito nga dali unta nilang  masikop  ang   suspetsado apan gialihan sila sa amahan ug igsoong babaye niini hinungdan  nga naka-eskapo.

Si Alparito miingon nga ang hinungdan sa maong pagpanunggab mao ang pagdumot kay ang duha dugay na nga nagkaaway. (BANAT NEWS)