Van nga dunay mga tawo napusa sa nahagsang sementong kisame

CEBU, Philippines - Usa ang patay laing duha ang angol samtang luwas ang usa ka batang lalaki nga gibana-banang nagpanuigon og 3-4-anyos human ang ilang gisakyang van napusa dihang nahagsaan kini sa beam sa duha ka andanang residential building diha sa barangay San Isidro, dakbayan sa Talisay tungod sa kusog kaayong linog kagahapon sa buntag. Ang maong trahedya naatol sa pagsaulog sa pista sa dakbayan sa Talisay kagahapon Oktubre 15, 2013.

Patay nang nadangat ngadto sa Talisay City District Hospital si Lerie Planos, 28-anyos dihang napiit kini diha sulod sa van. Si Planos kinsa naglingkod pa sa likod sa driver’s seat gibana-banang kapin sa duha ka oras nga naugkat kagahapon sa mga rescuer.

Ang mga kauban ni Planos nga si Flobel Eborda, 27 ug Rose Marie Ihalas, 36, parehong nangaangol. Samtang ang nahisgutang batang lalaki nga wala pa makuha ang pangalan naluwas kini sa gwardiya sa Montery School nga si Junel Alia.

Ang duha ka mga sakyanan nga diha sa garahe-an sa building nangapusa usab kini human matagaki sa beam nga naputol. Si Kapitan Marieta Bucao mibutyag sa Banat News nga ang nahisgutang building gipanag-iya kini ni Remedios Tan. Ang umagad ni Tan nga si Donald Lim maoy drayber sa van apan sa wala pa molinog si Lim mikanaog kini sa van ug misaka ngadto sa taas sa ilang gipuy-an tungod kay dunay gikuha ug pagbalik pa niya pusa na ang ilang sakyanan.

Ang mga biktima giingong empleyado kini ni Lim sa ilahang travel agency ug padung unta silang mag-outing tungod kay holiday man kagahapon.

Nunot niini si FO3 Guiller Pegarido kinsa maoy nangulo sa Talisay Rescue Emergency Action Team (TREAT) mibutyag sa Banat News kagahapon nga si Antonio Cruz, hingkod ang panuigon, bulldozer operator diha sa Aznar Quarry sa sitio Tangub, barangay Lagtang ang naangol human nga naligdan sa bato diha sa ibabaw’ng bahin sa lugar samtang nagtrabaho kini.

Si Cruz gidala ngadto sa Talisay City District Hospital ug tungod sa kahimtang niini gibalhin ngadto sa Vicente Sotto Memorial Medical Center.

Laing naangol mao si Paquito Abella,  human naigo sa dakung bato ang ulo samtang nagkaon kini uban sa iyang pamilya diha sa ilang payag diha sa sitio Tiguib, barangay Lagtang. Matud usab ni Pegarido nga sa ilang natala tulo ka mga balay ang nangaguba diha sa sitio Tiguib human nangaligdan og bato nga gipanag-iya nila ni Dominador Onabia, Roldan Tancinco ug Manuel Echavez.

Dugang ni Pegarido nga pag-abot nila sa TCDH duna sila’y mga naabtang mga naangol apan dili pa siya makakompirma kung biktima ba usab kadto sa linog. (BANAT NEWS)