Laing duha ka nakalas sa baha sa Bayawan nailhan na

CEBU, Philippines - Nailhan na ang duha sa lima ka mga tawo nga nakalas sa baha sa dakbayan sa Bayawan sa Negros Oriental sa miaging adlaw.

Kini mao ang kasayoran nga gibutyag ni Supt. Renato Dugan ang Chief Regional Public Information Officer sa Police Regional Office 7.

Matud ni Dugan nga ang nalunod sa baha naila nga sila si Tanorio Bacorio, 60-70 anyos, ug si Ronald Garganian, 14- anyos samtang wa pa gihapon mailhi ang lain pang tulo ka mga tawo nga nakalas sa maong baha.

Miingon si Dugan nga normal na ang kahimtang sa Bayawan sa Negros ug mihubas na ang tubig ug mga tawo nibalik na sa ilang mga balay.

"Sumala sa atong nahinabi karon nga in-charge sa  Negros Oriental Provincial Police Office nga normal na ang situation karon ug ni-subside na ang tubig ug ang atong mga evacuees nibalik sa ilang tagsa-tagsa ka panimalay," matud ni Dugan.

Ang patay nga mga lawas  atua sa mortuary sa Bayawan City District Hospital.

Samtang ang pamilya sa polis nga nakabsan sa kinabuhi nga nag-rescue sa mga naapektahan sa baha makapaabot nga dunay hinabang nga ihatag ang kapolisan sa Rehiyon.

Matud ni Dugan nga makahatag og burial assistance ang PRO 7 sa pamilya sa nakalas nga polis ug padulong na ang Regional Director sa PRO 7 sa dakbayan sa Bayawan.

Base sa report sa Office of Civil Defense dunay usa ka tiguwang nga nadugang sa talaan sa mga nakalas sa maong siyudad, ug lima pa ka tawo ang pabiling missing lakip na sa lungsod sa Mabinay.

Gideklarar na ang state of calamity  tungod sa way puas nga pagbunok sa ulan dala sa   inter-tropical convergence zone.  (BANAT NEWS)