Bag-ong tanom nga kahoy ihulip sa purilong acasia

CEBU, Philippines - Patamnon  ang Department of Environment and Natural Resources (DENR) 7  og 13,800   ka  lumad  nga  matang sa kahoy dinhi  sa rehiyon 7.

Kun  ikatanom  na  ang  maong  gidaghanon  sa mga  lubangon  sa  kahoy,  ila usab  kining  atimanon sulod sa tulo ka tuig nga gidugayon.

Kini  aron   sa pagsiguro nga ang 80 porsiyento ka punoan  molampos  gayud sa pagtubo. Ang maong kamandoan sa ulohan nga buhatan sa DENR 7  giluwatan   aron  kahulipan  ang  mga  putlonon  nga  mga  tiguwang  na  nga  mga acasia  nga  naglumbay sa nasudnong mga dalan sa habagatang bahin sa lalawigan sa Sugbo.

Ang  maong  mga  acasia  nahimutang sa national road  sa dakbayan  sa Talisay, dakbayan sa Carcar, mga  lungsod  sa Minglanilla, ug   San Fernando.

Hinuon  una  putola  ang  mga  karaang  kahoy kinahanglan nga may  pagtugot  sa kapitan sa  barangay.

Ang maong lakang nga pagahimoon sa DENR 7  giduyogan  usab og mga kondisyon. Kahinumdoman nga si DENR  7  Regional Director  Isabelo Montejo  miingon nga  sa dili pa nila  ipaputol  ang  mga  karaang  acasia mopahigayon una sila og public consultation  gawas sa pagkuha og Environment Compliance Certificate  sa mopaputol  niini. (/WC) (BANAT NEWS)