17-anyos miuwang sa away maoy gidunggab patay

CEBU, Philippines - Patay ang usa ka 17- anyos nga biktima sa pagpanunggab tungod sa kasuko sa ilang silingan nga gihatagan sa laing silingan og botelya sa ilimnong makahubog alas-3 pasado ang takna sa miaging kaadlawon sa Zone Gabi, barangay Paknaan, dakbayan sa Mandaue.

Ang namatay mao si Abundio Roblica Albano, taga Zone Sibuyas sa samang  barangay samtang ang suspetsado mao si Jenrey Sillar Georpe, 21, nagpuyo sa maong dapit. Si PO1 Deck Duran Gabuya sa kapolisan sa Presinto 3 sa Mandaue City Police Office (MCPO) nga nahinabi sa Banat News miingon nga niagi ang suspetsado sa dapit nga giimnan usab nila ni Leonard Sobata Casia, 21, nga nagpuyo sa maong dapit.

Tungod kay silingan ra sila giagda ni Casia og usa ka botelyang beer si Georpe, apan gikatahong kalit nga nasinta ang suspek ug gibunal ang botelya nga gitunol kaniya sa ulo ni Casia hinungdan sa pagkasamad niini.

Ang minor de edad nga si Albano dali nga mipatunga sa duha apan gikatahong nasuko hinuon og maayo ang suspetsado ug miibot sa giluklok nga kutsilyo ug gihansakan ang bukobuko sa biktima.

Human sa pagdunggab daling misibat pahilayo ang suspek ug wala na maabti pa sa mirespondeng mga tanod nga sila si Antonio Noguera.

Daling gihatod ang biktima ngadto sa Mandaue City Hospital apan gideklarar kini sa mga doktor nga dead on arrival. (BANAT NEWS)