Negosyante gipasakaa’g kaso tungod sa sound
CEBU, Philippines - Gipasakaan og kaso nga civil sa barangay kapitan sa Labangon ang usa ka negosyante tungod sa kasaba sa sound system niini sa barangay ilabina panahon sa kagabhion.
Si Labangon barangay kapitan Victor Buendia mipasaka og kasong Abatement of nuisance batok sa negosyanteng si Gilbert Go tag-iya og usa ka mobile sound system.
Matud pa ni Buendia sa maong asunto nga giabusohan ni Go ang iyang katungod isip usa ka negosyante sa barangay pinaagi sa pagsaba-saba sa ilang lugar.
Suma pa sa barangay kapitan ang nahisgutang negosyante mibaliwala sa katungod sa iyang mga silingan gamit ang naglagubo nga sound system.
Sa reklamo ni Buendia iyang gisulti nga ang panimalay sa akusado gihimong working place para sa repair, sound testing storage, maintenance of a disco equipment ug parking lot para sa paghakot ug kuha sa mga disco equipment.
Ang maong kalihukan nakapabalda sa malinawong pagpuyo nila ug sa ilang mga silingan sa kumunidad.
Tungod niini napugos sila sa pagpausab sa ilang balay aron nga dili maapiktohan sa kalihukan sa negosyo sa akusado.
Iyang gipangayoan og danyos nga mobalor og P1 million ug attorney and legal fees nga mobalor og P80 mil. (BANAT NEWS)
- Latest
