10 mil ka senior citizen gibakunahan kontra pneumonia

CEBU, Philippines - Mga napulo ka libo ka senior citizens dinhi sa dakbayan sa Sugbo gikatakda nga hatagan og libre nga injection aron makalikay sila nga matakboyan og pneumonia.

Matud ni Cebu City Health Officer Stella Ygoña nga ang mga vaccines gihatag sa Department of Health (DOH) ug naglaum usab siya nga ang dakbayan sa Sugbo mopalit usab niini nga mga tambal aron daghan ang makapahimulos.

Kadtong mahatagan og anti-pneumonia vaccine luwas na siya gikan sa pneumonia sulod sa lima ka tuig. Ang matag vaccine pamalit sa tag P1,500 apan sanglit direkta nga supplier ang gipalitan sa DOH mokantidad lang og kapin sa P900 ang kantidad sa matag vaccine.

Matud ni Ygoña nga nabalaka ang DOH kay nagpakita nga misaka ang gidaghanon sa mga senior citizens nga namatay tungod sa pneumonia. Kaniadtong 2011, kapin lang sa 80 ang namatay sa pneumonia dinhi sa dakbayan apan pagka 2012 miabot na og kapin sa 100 ang nangamatay sa maong sakit.

Ang pneumonia wala kaayo mahatagi og pagtagad sa mga report sanglit ang kaso sa dengue maoy kanunay mahisgutan apan ang pneumonia mas gihulagway nga peligroso pa kay sa dengue.

Gawas sa mga tiguwang, ang labing dali nga matakboyan og pneumonia mao ang kabataan mao nga ang kagamhanan adunay programa nga mga bag-ong gihimugso nga bata hatagan g’yud og anti-pneumonia vaccines.  (BANAT NEWS)