PRO7 Director Constantino dismayado sa mga sakop kay di kinasingkasing ang ilang pagpatuman sa PIPS

CEBU, Philippines - Dismayado ang regional director sa kapolisan sa pagpatuman sa mga Police Integrated Patrol System sa tibuok rehiyon.

Si Police Chief Superintendent Danilo Constantino miingon nga wala siya matagbaw sa pagpatuman sa kapolisan sa PIPS sa tibuok rehiyon tungod kay di kinasing-kasing ang pagbuhat sa iyang mga sakop sa maong kampanya.

“Pinapatupad naman sa buong region ang PIPS, gusto ko sana for them to implement it by heart and not for compliance only,” matud pa ni Constantino.

Si Constantino nagkanayon nga kinahanglan gyud ipatuman sa kapolisan ang PIPS tungod kay usa kini sa paagi nga mapugngan ang mga krimen.

Sa  gihimong sanglitanan ni Constantino mao ang mga magpatrolyang patrolcars nga magpatuyang lang og padagan sa kadalanan inay maghinay-hinay nga sama sa dunay gipangita, samtang ang mga beat patrols nagmika, ug  dunay wala mosunod sa hustong pamaagi sa pagpahigayon og checkpoints.

“Di lang takbo ng takbo, alam naman natin na limited lang ang resources ng kapolisan,” matud pa ni Constantino. Tumong sa pagpatuman sa PIPS sumala pa ni Constantino nga maminosan ang mga insidente sa krimen dinhi sa tibook rehiyon kun dili man gani nila mapugngan. (Bryner Diaz/EIM)   

Mama ug anak nakuhaa’g shabu 

Nagtingkagol sa karsel ang usa ka inahan uban sa iyang anak ug duha ka higala niini dihang nasakpang naghupot og illegal drugs sa mga sakop sa Investigation and Detective Management Branch (IDMB) atol sa gihimo niining saturation drive diha sa sitio Riles Limtong barangay Mabolo sa miaging gabii.

Ang nasikop si Brenda Caliao, 53, ug anak niini nga si Felbert, 25, nasikop usab ang higala nila nga sila si Noel Gilig Digor, 22, ug Winston Seno, 22. Ang kapolisan sa IDMB mipahigayon og saturation drive sa dapit kini human usab sila makadawat og taho kalabot sa naghitak nga pagpamaligya og drugas sa dapit.

Matud pa nga ang upat nabantayan nga kadudahan kaayo ang mga lihok maong sila gisitar ug dihang girekisa nakuhaan sila og mga pinaketeng shabu ug drug paraphernalia.

Nakuha gikan kanila ang 35 ka gagmay’ng pakete sa gituohang shabu nga giingong nagkantidad og P200 kada usa niini. Si Caliao kusganong mihimakak nga iya ang drugas ug gitudlo niya ang anak kay mao kini ang tiggamitan og shabu. Sumala pa niya didto ra siya sa kasilyas dihang gidakop . (BANAT NEWS)