2 gikilatan patay Brenda D. Batuto ug

CEBU, Philippines - Duha ang patay human maigo sa kilat  didto sa mga barangay Biga ug Magdugo, dakbayan sa Toledo kagahapon  sa ala 1:00  pasado  sa hapon.

Patay nang nahiabot   didto  sa Carmen Copper Hospital si Victoriano Macaday Jr., 24, gwardiya sa Carmen Copper Corporation sa barangay Biga.

Sa imbestigasyon sa kapolisan   nasayran  nga si Macaday naglakaw  sa bakilid nga bahin sa lugar dihang naigo  sa kilat  duol sa punoan sa saging.

Si PO3 Alfredo Barquin nagkanayon nga niadtong higayona si Macaday giingong naggunit og martilyo nga gituohang maoy gidakop sa kilat.

Giingong si Macaday gigukod  sa kilat ug dihang  naigo   nahagba  dayon  sa yuta.

Si Macaday nakaangkon og mga paso sa lawas samtang ang punoan sa saging  sa iyang duol  nasunog  usab.

Ang laing biktima mao si Marites Lacheca kinsa niadtong higayona nanglaba sa ilang mga sinena  sa gawas  nga  bahin  sa ilang balay.

Si Marites gitawag  sa iyang  anak nga si Junior Lacheca, 16,  nga pasudlon  sa  balay apan nakurat  kini  sa pagkakita  niya sa iyang  inahan  nga  nagbuy-od  na  sa yuta  ug  ang  lawas  nabulit  sa  mga  paso  nga  patay  na.

Si SPO1 Benedicto Bobilles Jr. imbestigador sa hitabo nagkanayon nga wala makasinggit si Marites   kay naderetso  kini  og kamatay.

Matud ni Bobilles nga mga sa 1:30 sa hapon dihang  mipaka-paka  ang  dawugdog  uban  sa nagbadlis  sa langit  nga  kilat. 

Gani  si Raymundo Labajo, 16, mitawag kang Junior nga pasudlon ang iyang inahan sa ilang balay.

Sa maong hitabo, ang dakbayan sa Toledo nakasinati  usab  og black out apan  wala  hiabti  og 30 minutos nahibalik   ang  kuryente. (BANAT NEWS)