Pagpakabana sa SK-Basak, Mandaue sa mga panginahanglan sa senior citizens

CEBU, Philippines - Ang Sangguniang Kabataan sa Basak, Mandaue City, pinangulohan ni SK Chair Alyassa Tenchavez, mipasar og duha ka resolusyon nga naghangyo og dugang benepisyo alang sa mga senior citizens. Kini ang gitaho ni RL Gabrinez, Mandaue City.

Ang unang resolusyon naghangyo kang Senador Pia Cayetano, paggahin og salapi gikan sa iyang Priority Development Assistance Fund (PDAF) aron ipalit og uniporme alang sa mga rehistradong sakop sa Senior Citizens Association of Basak, Mandaue, Inc. (SCABMI).

Ang ikaduhang resolusyon naghangyo kang Senador Antonio Trillanes IV paggahin gikan usab sa iyang PDAF alang sa medical ug hospitalization assistance sa masakit nga mga senior citizens sa Basak-Mandaue.

Pagkakaron, matud ni Gabrinez, limitado kaayo ang hinabang sa mga masakit nga katigulangan, magsalig lang sa mga kabanay nga duna say kaugalingon nga mga pamilya.

Bisan tuod og si Tenchavez nagdala sa tingog sa mga batan-on sa konseho sa barangay, iyang gipakita ang pagpakabana ug pagtagad sa mga senior citizens, taliwa sa mga pagsaway sa ubang konsehales, kaylagi, dili kini iyang concern.

Matud ni Tenchavez, ang pagtagad sa mga senior citizens, pagpakabana natong tanan. Kini, aron pag-ila ug pagtamod sa natampo sa mga senior citizens in nation building.

Samtang sa laing bahin, si Dionisio Cababat, sa Brgy Bugho, Moalboal ning lalawigan, sa iyang sulat sa Senior Citizens Hour sa dyRC, nangutana kun mahimo ba kono magpasakop sa United Senior Citizens Multi-Purpose Cooperative of Cebu City, ang dili taga-Dakbayan sa Sugbo. Tubag ni Lita Lumibaw, treasurer sa Coop – mahimo.

Nangutana usab si Cababat kun makatambong ba kita sa regular nilang miting didto sa Moalboal, kay daghan kono silang buot masayran bahin sa senior citizens. Lisud. Paminaw lang kanunay sa Senior Citizens Hour matag Sabado, dyRC, 5:00 – 6:00 pm.

Ug … alang sa inyong kasayoran, ang Guinnes World Records, miila kang Salustiano Sanchez-Blasquez nga labing tigulang sa tibuok kalibutan sa iyang edad nga 112. Ang 116 years old, taga Japan, si Jiroemon Kimura, namatay sa miaging Hunyo 12, ning tuiga.

Unsay nakapaabot ni Blasquez pagka-112 years old? Iyang gi-attribute ang pagkatigulangon sa adlaw-adlaw niyang pagkaon og saging ug pagtumar sa Anacin.

Gumikan ini, ang mga scientists sa usa ka drug company sa America, nag-consider paggama og Bananacin tablet alang sa mga senor citizen nga buot pang kalugwayan ang ilang kinabuhi. Kanus-a kaha ni ma-available sa mga botika? Meantime, sige lag kaon og saging. Pangutan-a lang imong docktor o nutritionist kun hain ang mas sustansiyado, ang tundan ba o ang lakatan?

Ug … mga pagtuon nag-ingon nga “Old age is a state of mind. If people think that they are old and frail, they will act they’re old and frail.” Kun maghunahuna ka nga tiguwang na ka, tiguwang na ka. Unsay tambal ini? Stay active, keep your brain engaged, keep yourself busy. Pasakop sa senior citizens association & be sociable, tambong sa mga miting ini. Ayaw panglibak ug ayaw pagdaot sa kauban mong senior citizen. Be positive. Be prayerful. (FREEMAN)