Boat captain sa pumpboat nga nakapatay sa 16-anyos gibuhian

CEBU, Philippines - Gibuhian na ang boat captain sa MB Cherry 88 kansang batang tripulante natagak sa dagat ug nakaon sa palabad ug namatay sa miaging adlaw diha sa Brgy. Cao-oy sa isla sa Olango sa milabay’ng adlaw.

Matud pa ni PO2 Mark Anthony Zamora, imbestigador sa Station 1 sa kapolisan sa Olango kombinsido ang pamilyang Lauchenibre nga aksidente gyud ang hitabo mao nga dili sila mopasaka og kaso batok sa nagdumala sa pumpboat nga ig-agaw ra usab sa biktima.

Gani lakip ang tag-iyang Hapon mihatag usab og ayuda tungod sa kamatayon sa biktima ug sa pamilya niini.  Ang  boat captain nga si Jeremias Dilao gibuhian na sa kapolisan.

Kahinumduman nga atol sa pagdunggo sa pumpboat nabitik sa pisi sa angkla ang tiil ni Nelson Tagsip Lauchenibre, 16- anyos, hinungdan sa pagkatagak niini sa dagat ug napasok sa ilawom sa propeller.

Wala na madala pa sa tambalan ang biktima tungod kay namatay kini dayon tungod sa pagkatabas sa lawas niini sa bronse nga propeller. (/EIM) (BANAT NEWS)