DENR misakmit sa mga ihalas nga langgam nga gipamaligya sa aseras
CEBU, Philippines - Ang Department of Environment and Natural Resources (DENR) 7 pinaagi sa Protected Area Wildlife and Coastal Zone Management Services (PAWCZMS) nakarekober og 143 “illegally traded†nga mga langgam nga lain-laing klase nga mga mananap ihalas nga giabandonar diha sa Magallanes St. Cebu City, sa miaging adlaw.
Kini human sa usa ka raid nga gipahigayon sa DENR 7 pinanguluhan ni Biodiversity and Wildlife Management Section chief Ariel Rica kauban sa mga personnel gikan sa Philippine National Police (PNP) Cebu City.
Ang raid gihimo human sila nakadawat og tip gikan sa mga impormante bahin sa maong mga mananap nga gipamaligya sa dapit.
Ang mga nakumpiska naglakip sa 101 African Lovebirds (Agapornis species), 30 Hanging Parakeets (Loriculus philippensis), lima ka Coleto (Cercops calvos), duha ka Rufous hornbills (Buceros hydrocorax), duha ka Large-billed Crow (Corvus macrorhynchos), duha ka lack-capped Lory (Lorius lorry), ug usa ka Tarictic Hornbill (Penelopides Panini).
Gidala kini sa DENR 7 wildlife rescue facility sa Camp 7, Minglanilla, Cebu City ubos sa kustodiya ni Sony de Erio, DENR 7 rescue center caretaker.
Matud pa ni DENR 7 Regional Executive Director Dr. Isabelo R. Montejo nga ang pagpamaligya niini kalapasan sa Sec.27 sa Republic Act 9147 o Wildlife Resources Conservation and Protection Act.
Apan bisan usa ka tawong namaligya niini way nadakpan ang kapolisan ug DENR. Ang mga nasakmit nga langgam dalhon sa Ayungon sa Negros Oriental. (BANAT NEWS)
- Latest
