Mga Africano gi-monitor sa tugpahanan

CEBU, Philippines - Hugot nga gi-monitor  sa  mga otoridad  ang  mga langyaw nga  mopalusot og illegal nga drugas agi sa tugpahanan  sa Mactan.

Matud pa ni Capt. Reynaldo Lascuta ang Sector Commander sa Customs Police nga dugay na nilang giimplementar ang pag-monitor sa mga pasahero nga gikan sa nasud sa Africa.

Kini  tungod   kay  posibleng ang mga  Africano  maoy midala og illegal nga drugas dinhi sa Sugbo.

Gumikan sa pagkasikop   sa usa ka  Nigerian national nga nakuhaan og illegal nga drugas sa mga sakop sa NBI 7 didto sa Liloan, mas gipahugtan   nila  karon ang ilang  pagbantay  sa  mga  kargamento   sa  mga Africano  nga  moanhi   sa Sugbo.

Gipasalig  ni  Lascuta  nga ilang  himoon  ang 100% nga pag-inspection sa ilang mga bagahe aron walay makalusot nga illegal nga drugas.

Hinuon matud pa ni Capt. Lascuta nga mas maayo kung adunay pasiunang impormasyon   nga  ilang  madawat    bahin  sa mga pasahero   nga gikan sa gawas sa nasud nga may dala nga illegal nga drugas nga ipalusot dinhi sa lalawigan.

Kahinumdoman nga duha na ka drug mule gikan sa nasud sa Kenya ang nasikop sa pagdala og illegal nga drugas sa nasud .(WC)  (BANAT NEWS)