Bayot nga gipatay niadtong Biyernes nakuykoyan ilawom sa taytayan

CEBU, Philippines - Patay’ng lawas sa usa ka bayot nga na-missing sukad pa niadtong Biyernes sa kaadlawon nakuykuyan sa gilubngan niini ilawom sa taytayan sa Mahiga  Bridge sa barangay Banilad sa miaging gabii apan nagsugod na kini og kadugta. Ang biktima nga giila lang sa pangalang “Dianne” nakaangkon og samad dinunggaban sa kalawasan ug padayon pang gipangita ang mga kabanay niini.

Usa ka Crisanto Abarquez, 19, nga usa ka basurero ang miangkon nga maoy mipatay sa biktima. Matud pa niini nga igo ra niyang gipanalipdan ang iyang manghod nga giyatakyatakan sa biktima ug gisuwayan pa og duslak og kabilya.

Usa ka 15-anyos nga nagdumili sa paghatag sa iyang ngalan mipadayag nga niadtong Biyernes sa kaadlawon iyang nakit-ang nag-estorya ang biktima ug ang suspetsado apan sa iyang pagbalik nakita niyang gidunggab-dunggab kini sa suspetsado.

Human niini gitabonan sa suspetsado uban ang laing mga bata ang biktima diha sa ilawom sa taytayan. Giingong gibaharan sila sa suspek nga pamatyon usab niya sila kung mosumbong sa kapolisan.

Human sa maong insidenti giingong pipila pa ka adlaw nga diha mag-estaran ang suspetsado apan dihang mihinay-hinay nangalisbo ang baho misibat na kini apan nasubay sa kapolisan sa Mabolo Police ang gitagoan sa suspetsado diha sa Archbishop Reyes.

Giangkon sa suspek nga nakahimo siya og salaod  apan gibuhat niya kini aron luwason ang iyang manghod.

“Naghilak ko’g taman pagkahuman, unya nahadlok ko. Nagmahay man ko pero sama nako nga ako man nang sala angay sad nakong bayran,” pasabot pa sa batan-on.

Gibutyag usab ni Abarquez nga ang biktima mamaligyaay og solvent sa ilang dapit sulod na sa usa ka tuig. (Lesley Caminade-Vestil/EIM) (BANAT NEWS)