Kanhi brgy. treasurer nag-atubang og kasong malversation of public funds

CEBU, Philippines - Pormal na nga gisang-at sa buhatan sa Visayas Ombudsman ang kasong malversation of public funds batok sa kanhi barangay treasurer sa barangay Zapatera ,syudad sa Sugbo  tungod sa kapakyas sa pagtugyan sa pundo sa barangay nga mobalor og kapin sa usa ka milyon ka pesos. Ang gipasakaan og kaso sa Ombudman Visayas mao si Ma. Carissa Polotan, hingkod  ug kanhi  tresurera  sa  barangay  Zapatera

Ang maong kaso nga gisang-at na sa korte nga giaprobahan ni Deputy Ombudsman for the Visayas Pelagio Apostol   nga  mibase sa reklamo nga giduso sa Commission on Audit ( COA)-7.

Sigon sa maong sumbong, si State Auditor Francisca Jumao-as  nagkanayon nga mipahigayon siya og examination sa cash ug account sa treasurer sa barangay Zapatera  gikan sa Enero 1, 2007 hangtud sa Marso 24,2009 ug iyang nakita nga nahanaw ang P1,273,580.64. Suma pa niya nga iyang gihatagan og kahigayonan ang akusado sa pagpangita ug sa pag-uli sa maong kwarta apan bisan pa man niini wala gyud   siya nakahatag sa maong     kantidad.

Si Graft Investigation and Prosecution Officer II Pio Dargantes miingon usab nga iyang gihatagan og kahigayonan nga moduso sa iyang counter affidavit sa buhatan sa Ombudsman apan si Polotan napakyas sa pagtuman  niini.

Gumikan  niini, nahinayon  gyud  ang  pagpasaka  sa  kasong criminal batok ni Polotan ngadto sa korte.

Ang prosecution mihatag sa akusado og higayon nga  makapiyansa  og P40 mil  alang  sa temporary  niyang  kagawasan  sa prisohan. (/WC)