Komitiba nga motuon sa mga kontrata mugnaon ni Davide

CEBU, Philippines - Moumol og komitiba si Gobernador Hilario “Junjun” Davide III nga maoy tahasan pagsusi sa tanang mga existing contract nga gisudlan ni kanhi gobernador Gwendolyn Garcia nga karon kongresista sa 3rd district sa Sugbo.

Matud ni Gobernador Davide ang maong komitiba  nga iyang mugnaon maoy iyang tahasan  sa pag-review sa tanang kontrata  nga iyang nasunod gikan sa milabay’ng administrasyon ilabina kadtong mga kontrata nga walay pagtugot gikan sa Hunta Provincial.

Matud ni Davide   nga kinahanglan  ang tanang transaksiyon sa Kapitolyo moagi   nga  may  pagtugot  gikan sa Hunta Probinsiyal.

Dugang ni Davide nga iyang hatagan og duha ka bulan ang maong komitiba  apan wala pay gitug-an nga mga ngalan ang gobernador kun si kinsa ang molangkob  ning  maong  pundok.

Subling gipasalig ni Davide nga himoon niya kutob sa mahimo nga ikapahibawo sa mga Sugboanon ang tanang mga programa nga mugnaon sa Kapitolyo.

Dugang niya nga iyang ipagawas sa dili madugay ang tinud-anay nga financial status sa Probinsiya sa Sugbo nga iyaha pa  usab karon nga gipatun-an og balik. Si Davide subling mitataw nga prayoridad niya karon ang mga batakang serbisyo ilabina   na  ang  pagpatuman og mga programa alang sa kahimsog sa panglawas. (BANAT NEWS)