Rama makigkita pag-usab ni PNP director Purisima

CEBU, Philippines - Gibutyag ni Mayor Michael Rama nga nagplano siya nga balikon didto sa Camp Crame si PNP Chief Allan Purisima aron magpakisayod nganong gitudlo na gyud nga full-pledged director sa Cebu City Police Office (CCPO) si Senior Superintendent Mariano Natuel nga walay pagtugot kaniya.

Matud ni Rama niya nga kun ang kadagkoan sa Camp Crame moinsistir nga sila ang magbuot kun kinsa ang itudlo nga hepe sa kapolisan, awhagon niya nga magpirmahay sila og kasabutan nga kun adunay problema sa kahusay ug kalinaw dinhi sa dakbayan sila ang manubag ug walay labot ang mayor.

Wala pa gyud hinoon moabot sa huna-huna sa mayor nga pangbawion ang tanang sakyanan sa City Hall nga gipagamit isip patrol car sa kapolisan, apil ang paghunong na paghatag og gasolina ug ubang mga pagtabang sa Cebu City Police Office sama sa pagpaayo sa ilang headquarters.

Si Rama miingon nga klaro kaayo ang balaud nga gilatid sa Section 63 sa Republic Act 8551 nga ang mayor maoy gihatagan og katungod nga mopili kinsa ang itudlo nga hepe sa mga dakbayan ug lungsod. Ang katungdanan sa kadagkoan sa kapolisan mao ra ang pagsumiter sa lista sa mga opisyal nga pilian sa mga mayor.

Gusto ni Rama nga si Senior Superintendent Noli Romana nga classmate ni kanhi CCPO director Melvin Ramon Buenafe sa pagtungha sa Philippine National Police Academy (PNPA) maoy itudlo nga hepe sa 900 kapin sa mga polis sa dakbayan. (Rene U. Borromeo/EIM) (BANAT NEWS)