Rama nasuko nga si Sr. Supt. Natuel permanente nang direktor sa CCPO

CEBU, Philippines - Pwerteng sukoa ni Mayor Michael Rama pagkasayod nga ang Camp Crame mitudlo na diay ni Senior Superintendent Mariano Natuel isip “full-pledged director” sa Cebu City Police Office sugod kaniadtong Mayo 10.

Giangkon ni Natuel nga gusto ra unta niya nga ihilom ang pagtudlo kaniya sa Camp Crame isip direktor sa kapolisan dinhi sa dakbayan sa Sugbo aron nga dili masuko ang mayor apan nahibaw-an kini sa mga sakop sa media.

Matud ni Mayor Rama nga nakalitan kaayo siya pagkasayod sa report gikan sa Banat News ug daw dili siya makatoo kay bag-ohay pa lang gani siya nga miadto sa Camp Crame ug nakighinabi ni Philippine National Police (PNP) Chief Allan Purisima.

Si Rama nagkanayon nga malaumon gani siya nga si Purisima motudlo na ni Senior Superintendent Noli Romana hulip kang Natuel sa dili pa magsugod ang bag-o niya nga termino pagka mayor karong Hulyo 1.

Mibahad si Rama sa kadagkoan sa kapolisan, apil na si Police Regional Office (PRO)-7 Regional Director Marcelo Garbo nga putlon na sa City Hall ang paghatag og hinabang sa kapolisan tungod sa wala nila pagtuman sa balaud.

Ang dakbayan naghatag og tag P2,000 sa matag usa sa kapin sa 900 ka polis nga ania madestino sa dakbayan, mga sakyanan ug gasolina alang sa kapolisan.

Gawas niana ang City Hall duna pa’y ubang gahin nga gihatag sama sa pagpaayo sa gubaon na unta nga building sa CCPO.

Gihulagway sa ubang opisyal sa kapolisan nga kun ang City Hall mo-pull out sa tanang mga sakyanan ug dili na mohatag og hinabang sa kapolisan, maapektahan ang pagmentinar sa peace and order.

Ubos sa balaud ang kadagkoan sa Camp Crame, pinaagi sa PRO-7, igo lang moendorsar ngadto sa mayor og labing minus tulo ka ngalan sa mga opisyal nga pilian niini aron itudlo nga hepe sa kapolisan.

Matud ni Rama nga dili mahimo nga supakon sa kadagkoan sa Camp Crame ang balaud. (/EIM) (BANAT NEWS)