NBI wa pa gihapo’y nasang-at nga kaso sa Ducayag killing

CEBU, Philippines - Wala pa gihapo’y napasakang kaso ang National Bureau of Investigation batok niadtong mga tawong giingong mikulata ug nakapatay sa tinun-ang si Mario Alfie Ducayag kinsa gipasanginlang nangawat sud sa usa ka department store sa dalan Colon.

Human sa gipangayong lima ka adlaw sa NBI  aron matun-an pa pag-ayo kung unsa nga kaso ang ipasaka ngadto sa mga sad-an, gibalikan sa mga tigbalita ang maong buhatan aron sa pakisusi.

Apan gipahibalo sa NBI nga wala pa gihapon sila’y ikahatag nga kalamboan sa maong kaso.  Gibutyag ni Atty. Antonio Pagatpat, Regional Director sa NBI nga iyaha pa karon gisubay pag-ayo ang 200 ka panid nga affidavit nga mao ang basehan unya sa kasong ipasaka.

Matud ni Pagatpat nga iyahang ipatawag ang duha ka empleyado sa maong mall tungod kay nagtuo siyang makatabang kini og dako sa pagresolbar sa kaso.

Sumala pa ni Pagatpat nga dako kaayo og papel ang maong duha ka witness tungod kay adunay isyu nga didto usab nagagikan nila nga wala masuwat sa mga affidavit nga kasamtangang gihuptan karon sa ilahang buhatan.

Gikinahanglan matud pa ni Pagatpat nga hinog gyud ang kaso nga ilahang ipasaka aron mapagawas gyud kung unsay tinuod nga nahitabo.  Si Pagatpat midugang nga naghuwat ang pamilya ni Ducayag nga mapagawas ang resulta ug wala usab siya makadawat og reklamo kalabot sa kadugay sa imbestigasyon. Sumala pa ni Pagatpat nga dili niya isakripisyo ang kaligdong sa imbestigasyon tungod lang sa usa ka saad nga iyahang gibuhian. (BANAT NEWS)