Inside job gisalikway, 5 CCTV wa matutok sa imahen sa Senyor

CEBU, Philippines - Gisalikway na sa kapolisan ang anggulong inside job sa nahitabong pagpangawat sa alahas sa imahe ni Senyor Sto. Niño sa sulod sa Redemptorist Church sa barangay Camputhaw sa siyudad sa Sugbu sa miaging adlaw.

Ang hepe sa kapolisan sa Theft and Robbery Section,  Inps. William Alicaba mipadayag nga ilaha nang giimbitar ang upat ka mga staff sa maong simbahan ug ilang nasuta nga wala gyud sila’y kasayuran sa maong hitabo.

Sa pagkakaron pabiling blanko pa ang kapolisan kun si kinsa ang mikawat sa mga mahalong alahas sa imahe. Nasuta nga layo ra kaayo ang anggulong makuha sa lima ka closed-circuit television camera palibot sa simbahan ug wala maapil ang estante nga gihimutangan sa imahen sa Senyor Sto. Niño.

Subling gipahinumdoman ni Alicaba ang publiko ilabi na sa mga bay patigayon ug mga dapit nga dunay bililhong mga butang nga dili gyud magkompiyansa.

Sa milabay’ng buwan, gikawatan usab ang San Pedro Calungsod Chapel diha sa South Road Properties ug nadala ang mga cash ug tseke nga nagkantidad og P100 mil. (/EIM) (BANAT NEWS)