Cebu City SKF President miklarong di tingog sa pederasyon ang gipamahayag ni Cabataña

CEBU, Philippines - Giklaro ni Cebu City Sangguniang Kabataan Federation (SKF) president John Philip Po II nga dili baruganan sa ilang pundok ang pamahayag ni SKF vice president, Devyn Genel Cabataña, nga nag-endorsar  sa Team Rama.

Matud pa ni Po, non-partisan ang SKF maong wala silay gi-endorsar nga pundok, apan miklaro nga wala kini magpasabot nga dili na makapili og kandidato o partido ang matag miyembro.

Apan kini sa personal paagi sa pagsuporta ug dili sa tibuok SKF. Si Po miingon nga nakurat siya sa dihang iyang nabasahan sa pamantalaan nga naay grupo nga giendorso ang Cebu City SKF.

Samtang si Cabataña sa iyang bahin, mibarog sa iyang gibuhiang pamahayag nga nag-representar siya sa pundok sa mga SK officials gikan sa nagkadaiyang barangay nga nagsuporta sa Team Rama.

Ilaha kini inisyatiba ug dili sa kinatibuk-ang Cebu City SKF.  Si Po, sa iyang bahin personal usab nga misuporta sa kandidatora sa Bando Osmeña Pundok Kauswagan (BOPK).  (BANAT NEWS)