Pasyente namatay kay wala atimana sa hospital

CEBU, Philippines - Gitug-an ni 4th District Cong. Benhur Salimbangon nga may pasyente gikan sa isla sa Cinatarkan sakop sa lungsod sa Santa Fe sa isla sa Camotes ang namatay human gikatahong  gibalibaran sa Severo Verallo Memorial District Hospital sa siyudad sa Bogo niadtong ikaduhang semana sa bulan sa Marso ning tuiga.

Matud pa ni Salimbangon gidala ang wa niya hinganling pasyente ug kung unsay sakit niini, didto sa maong tambalanan apan wala kini atimana sa nahisgutang hospital tungod kay nagdala kini og Benhur Health Card.

Tungod niini gidala na lang og balik ang maong pasyente ngadto sa nahisgutang isla ug didto na giatiman sa balay hangtud kini namatay paglabay sa pipila ka adlaw.

Giklaro sa kongresista nga gikan sa iyang Priority Development Assistance Fund kon PDAF ang gahin niini ug may pundo pa alang niini. Nagduda siyang gipugngan kini sa Kapitolyo human nasuspenso si Gov. Gwendolyn Garcia.

Gisulayan sa pagkuha og kasayuran ang kadagkuan sa Integrated Provincial Health Office apan nagdumili sila sa pagtubag sa maong isyu.

Apan ang hepe sa maong tambalanan nga si Dr. Carlos Leyese mihimakak nga may gibalibaran silang pasyente gikan sa maong isla tungod kay matud niya tanang mga masakiton nga moduol sa ilang hospital ilang dawaton ug i-admit kun gikinahanglan.

Kadto lang magkinahanglan og major operation ilang ipadala sa Vicente Sotto Memorial Medical Center.

Matud pa ni Leyese nga ini’g gawas na sa pasyente nila sila pangayuan og Philhealth Card, 4P's ug Benhur Health Cards.

Apan iyang giangkon nga may bag-o nang gipatuman nga proseso sa pagpagawas sa pundo alang sa mga pasyente nga mopakita og Benhur Health Card kay gihunong na ang naandang proseso niini nga didto i-bill sa Kapitolyo sugod niadtong bulan sa Marso.

Iyang giklaro nga ang mga pasyente nga may Benhur Health Card moadto una sa Medellin District Hospital aron sa pagpa-in-cash niini ug maoy ibayad sa ilang hospital.

Ang volunteer sa health card ni Salimbangon sa Bogo nga si Boboy Balbin miangkon nga may mando gikan sa Kapitolyo nga dili ipadawat ang Benhur Health Card hinungdan nga si Salimbangon nibutang og pundo ngadto sa Medellin District Hospital alang sa mga kabos nga pasyente nga malandig sa hospital sa Bogo.

Iyang gitataw nga nagpadayon gihapon ang pagpanghatag nila og pundo alang sa mga pasyente nga may Benhur Health Card apan lahi na ang proseso niini. (BANAT NEWS)