Di cardiac arrest bolitas sa heart ug tiyan ang gikamatyan

CEBU, Philippines - Dili atake sa sakit sa kasingkasing ang gikamatyan ni Endredia Alfar kondili napusilan kini og shotgun tungod sa mga bolitas nga nakuha sa iyang lawas human sa awtopsiya.

Gikonsiderar nang daan nga suspek ang bana niyang si Francisco tungod sa mga kadudahan niining pamahayag ug pagmagahi nga ipailawom sa awtopsiya ang patay’ng lawas sa ginang. Ang magtiayon nagpuyo sa West Poblacion sa dakbayan sa Naga.

Ang medico legal nga si Dr. Nestor Sator sa PNP Crime Laboratory mibutyag  nga duna siya’y nakuhang duha ka bolitas sa kasing-kasing ug tiyan sa ginang. Matud pa ni Sator nga internal hemorrhage ang gikamatyan sa biktima tungod sa samad pinusilan.

Dugang pa ni Sator nga usa ka leksyon alang sa ubang mga doktor ang nahitabo kang Endredia sa sayop nga diagnosis sa naingnan sa kamatayon nga wala gani mopahigayon og sinigurong physical examination kung duna bay injuries ang pasyente.

Ang anak sa magtiayon nga si JP uban sa iyang asawang si Juvy dihang gikuhaan og pamahayag sa Banat News bahin sa findings miangkong naglibog na sila sa dagan sa hitabo.

Samtang si Francisco nga kasamtangang nabalhog sa karsel sa dakbayan sa Naga, kusganon gihapon kaayong mihimakak nga iyang napusilan ang iyang asawa.

Gipaabot pa ang resulta sa paraffin test ni Francisco apan daan na kining mipadayag nga magpatabang siya sa National Bureau of Investigation (NBI) kun mag-positibo siya sa gun powder residue nga maoy makita sa paraffin test. Apan matud pa ni SPO2 Saul Alejandria, imbestigador sa maong kaso, aduna silay nakuhang mga saksi nga makapamatuod nga si Francisco maoy responsable sa kamatayon sa ginang.  (BANAT NEWS)