Sa Semana Santa terminal ug pier area sa Mandaue higpitan ang seguridad

CEBU, Philippines - Higpitan sa kapolisan sa Mandaue City Police Office (MCPO) ang North Bus Terminal ug pier area pinaagi sa pagdestino og kapin sa 20 ka mga polis aron motabang sa pagbantay sugod karong Domingo.

Gipaabot nga sa maong adlaw magsugod na sa pagpamauli  ang mga tawo balik sa ilang mga probinsya aron magbakasyon tungod sa Semana Santa.

Si Senior Inspector Franco Oriol, hepe sa kapolisan sa Presinto 2 sa MCPO nga nagbase sa barangay Subangdaku nga nahinabi sa Banat News miingon nga sugod karong Domingo 18 niya ka mga sakop ang i-deploy sa NBT.

Matud pa niya dugang mga polis usab ang ibutang sa ilang headquarters sa Mandaue City Police Office (MCPO) gikan sa Mobile Patrol, mga sakop sa Special Weapon and Tactics (SWAT), mga sakop sa bomb squad sa kapolisan,  mga sakop sa Traffic Division;  K-9 Unit; ug mga sakop sa Bureau of Fire Protection (BFP). Dugangan pa kini og force multipliers nga gilangkoban sa mga barangay tanod sa Subangdaku.

Usa ka police assistance desk ang ibutang aron kadangpan sa mga pasahero kun adunay ilang masinati nga kakulian. Gawas sa NBT, lakip sa butangan og dugang polis ang pier area sa Mandaue nga naglakip sa Pier 5, Pier 6 ug Pier 7 sa reclamation area. (BANAT NEWS)