228 pasahero ug tripulante naluwas sa Dumaguete

CEBU, Philippines - Barko sa George and Peter Lines nga M/V Zamboanga Ferry giingong napagngan og makina ug nasangad tungod sa kakusog sa bawod nga dala sa bagyong Auring dihang paingon nang modunggo sa pantalan sa Dumaguete kagahapon sa buntag.

Ang maong barko nga nagbiyahe gikan sa Dapitan, Zamboanga paingon sa Dumaguete dunay 228 ka mga pasahero ug 63 ka mga tripulante. Si Georgia Felice ‘Jaja” Chiongbian Rama, Vice President sa GP Lines Inc. mihimakak sa report.

“There is no truth to some reports that this was caused by engine failure or that the ship ran aground, otherwise the vessel would not have been able to maneuver out of the port area,” matud pa ni Rama.

Ang barko gikatakdang modunggo sa Pier 4 sa Dumaguete mga alas 9:00 sa buntag apan tungod sa bagyo naglisod kini pagpaduol sa pantalan tungod kay gibutang sa public storm warning signal number one ang Dumaguete.

Gipasabot ni Georgia nga tungod sa kakusog sa hangin ug bawod dala sa bagyong Auring naputol ang higot sa barko hinungdan nga napadpad kini ug naglisud na sa pagdunggo sa pantalan.

Daling gimaniobra sa kapitan sa barko ang vessel aron dili kini mabangga sa pier ug malikayan ang posibleng dakong disgrasya nga mahitabo.

Matud ni Georgia nga prayoridad nila ang  kaluwasan sa mga pasahero ug tripulante. Ang barko didto na midunggo sa pier 6 ug gi-quadruple-tie kini aron dili mobangga sa boulevard.

Mga alas 4:00 sa hapon kagahapon ang tanang pasahero ug tripulante luwas nga nakakanaog gikan sa barko pinaagi sa pagpabalhin kanila sa rescue boats sa PCG.

Sa laing bahin, tungod sa kakusog sa unos dala sa bagyong Auring kagahapon sa kaadlawon duha ka mga mananagat nga sila si Ruben Quilo, 45-anyos ug Jessie Alcover, 32, parehong taga Bantayan, Tuyom sa dakbayan sa Carcar ang napadpad ngadto sa kalawran sa lungsod sa Sibonga.

Hinuon si PO3 Vicente Garces Jr., duty desk officer sa Carcar Police Station sa pakighinabi niini sa Banat News kagahapon nagkanayon nga bisan sa unos hinayhinay nga nakabalik sa ilaha ang duha gamit ang bugsay alas 4:00 sa hapon kagahapon. (Brenda D. Batuto/EIM) (BANAT NEWS)