Pagpangisyu og ICC stickers sa helmet kutob ra karong adlawa

CEBU, Philippines - Kutob na lang karong adlawa ang pagpang-isyu og Import Commodity Clearance (ICC) stickers ug pagproseso sa mga helmet subay sa R.A. 10054 o Mandatory Standard Protective Helmet Act of 2009.

Atol sa nahitabong briefing sa implementasyon sa Helmet Law kagahapon sa Sacred Heart Center sa syudad sa Sugbo, gitug-an ni Land Transportation Office (LTO-7) Regional Director Raul Aguilos nga sugod karong Enero 2 sunod tuig hingpit na gyud nga ipatuman ang implementasyon sa Helmet Law.

Nianang maong adlaw sugdan na ang pagpanakop og mga drayber sa motorsiklo o ba kaha pasahero nga masakpang wala magsul-ob og helmet nga gimando sa balaod.

Dugang pa ni Aguilos nga taas kaayo ang panahong gihatag alang sa mga motorista aron magpabutang og stickers sa Department of Trade and Industry (DTI). Adunay 83 ka mga nalistang brands sa helmet sa  buhatan  sa DTI nga pasado ug kaisyuhan og ICC stickers.

Kahinumduman nga daghang mga misupak sa implementasyon sa Helmet Law maong imbes nga sa bulan sa Agosto kini ipatuman gisibog kini sa Enero 2 sa sunod tuig. Sumala pa usab ni DTI-7 Regional Director Asteria Caberte nga kutob alas-5 na lang sa hapon karong adlawa sila manawat ug mamilit og ICC stickers.

Gibutyag ni Caberte nga wala na silay ihatag pang laing lugway tungod sa kataas na sa panahong ilang gihatag sa mga motorista.  (BANAT NEWS)