Drayber nakatagpilaw usa patay, duha naangol

CEBU, Philippines -  Patay ang usa ka sakop sa Clean and Green Program sa siyudad sa Lapulapu human kini ug laing duha ka tawo ang gidaro sa usa ka taksi nga ang drayber nakatagpilaw og katulog kay 24-oras nang namasahero.

Ang namatay mao si  Roberto Patalinghug Sr., 57, kinsa nanilhig sa daplin sa dalan nianang tungora ug naangol usab ug nalandig sa usa ka pribadong tambalanan sa siyudad sa Sugbo ang magsuong sila si Jesus Nacional, 25, ug Carolina Nacional, 35.

Ang drayber nga nabalhog na karon sa karsel mao si Tarcisio Navaro Rocolas Jr. 43, nga taga Guadalupe, Cebu City.

Matud pang PO1 Cesar Gabule sa Traffic Division sa Lapulapu City Police Office, base sa imbestigasyon ni PO2 Joven Seno naghatud og pasahero niadtong tungora si  Rocolas dihang kalit kini nakatagpilaw sa manobela.

Diha ra kini nakamata human madaro ang mga biktima daplin sa dalan ug misaka na sa gutter ang iyang taksi. Ang mga biktima gidala sa Lapulapu City District Hospital apan namatay si Patalinghug. (BANAT NEWS)