Delivery truck nga puno og beer gihimulbolan sa mga tawo

CEBU, Philippines - Mopasaka og kaso ang usa ka negosyante batok sa daghang mga molupyo sa pito ka mga barangay sa lungsod sa Barili ug ingon man sa mga pulis sa maong lungsod tungod sa pagpangawat sa usa ka trak niining beer nga mokantidad og dul-an sa tunga sa milyon ka pesos diha sa Sityo Tayong barangay Guimbuwangan Barili sa may alas 5:00 sayo sa buntag.

Ang negosyante nga si Carlito Chua tag-iya sa Solid Gold Lines Trucking Company ug kapitan sa barangay Kawasan lungsod sa Aloguinsan mibisita sa buhatan sa kapulisan sa miaging adlaw aron pagpa-blotter sa dugang mga pangan nga responsable sa pagpangawat sa  ilang beer.

Matud ni Chua dihang nahinabi sa Banat News nga moabot og 1,352 ka case nga beer nga paingon nga i-deliver sa lungsod sa Dumanjug niadtong tungura apan pag-abot sa kurbadahon nga bahin sa maong lugar nangatagak ang napulo ka case diha sa karsada.

Ang drayber  nga si Islas Yusuri ug helper nga si Anjun Calledo daling mipunit sa mga wala pa mangabuak, apan  mao na lay ilang nakita ang kalit nga pagdugok sa mga tawo ug may usa nga nagdala og sundang ug giputol ang pisi nga nagpugong sa trapal sa ilang kargamento.

Diha-diha ang maong mga tawo nanguha sa ilang mga kinahong beer ug bisan giunsa nila og pugong ug hangyo wala sila paminawa ug nag-iyahay pa gihapon og panguha ug gidala sa ilang mga panimalay.

Sumala pa nga nabantayan pa sa iyang drayber nga ang ubang beer gikarga sa mga tawo sa duha ka mga pumpboat ug ang uban gikarga usab og mga traysikol.

Walay nahimo ang drayber ug helper niini gawas sa pagbiya sa lugar ug midangop sa kapulisan aron i-report ang hitabo apan gikasagmuyo ni Chua nga matud pa gibalibaran ang iyang mga sakop sa mga polis tungod kay giingong walay gasolina ang ilang patrol car. Tungod niini walay nahibilin bisan usa ka kahon sa ilang kargamento sa ilang pagbalik, hinuon sa tanto nilang pagsubaysubay nabawi nila ang 60 ka case apan ang nangawala mokantidad og P430 mil.

Duna nay mga tawong nailhan nga ilang gikatakdang pasakaan og kaso nga pulos mga residente sa barangay Japitan, barangay San Rafael, barangay Guimbuwangan, barangay Sayaw, barangay Minolos, Guiwanon  ug sa Poblacion.

Kasong highway robbery ang gitun-ang kaso nga isang-at ni Chua sa mga suspek ug gitun-an na nila ang kasong ipasaka batok sa kapolisan sa Barili tungod sa kapakyas nila sa pagresponde.

Si PO3 Elmer Opsema sa Barili Police Station nga nahinabi sa Banat News mihimakak nga wala sila moresponde kay matud pa hapit na alas 7:00 sa buntag naka-report ang drayber ug helper niini ug mga alas 5:00 pa sa buntag ang hitabo.

Matud niya dihang miresponde ang iyang mga kauban 60 ka case na lang ang ilang nabawi. (BANAT NEWS)