K9 Units ug Port Police maghigpit atol sa National Thanksgiving Mass

CEBU, Philippines - Hugot nga gipatuman ang seguridad sa mga pantalan sa umaabot nga pagpahigayon sa Thanksgiving Mass ni San Pedro Calungsod karung umaabot Nobiyembre 30 diha sa South Road Properties.

Si Port Police, chief of operation Joshua Pantoja mipadayag nga andam na sila sa  maong selebrasyon ug walay angayang ikabalaka ang mga deboto o bisita dinhi sa dakbayan sa Sugbo sa ilang pagbiyahe.

Samtang ang mga sakop usab sa Philippine Drug Enforcement Agency (PDEA) mipahigayon usab kagahapon og inspeksyon sa tanang pantalan kini aron sa pagsusi kun aduna ba gihapoy mga gipalusot nga mga illegal nga drugas.

Matud pa ni Animal Keeper 2 Carlito Ermac, ang chief sa K9 Special Enforcement Service sa PDEA nga dili lang drugas kun dili lakip mga bomba o pulbora ang ma-detect sa mga K9.

Atol unya sa adlaw sa selebrasyon mas pahugtan pa nila ang pagpaniid sa mga pantalan. (BANAT NEWS)