11-anyos gidagit sa tiguwang padayong gipangita

CEBU, Philippines - Padayon karun ang imbestigasyon sa kapulisan bahin sa alegasyon sa usa ka 11-anyos nga dalagita nga tinun-an sa grade-3 nga giingong gidagit didto sa barangay Baliwagan sa lungsod sa Balamban niadtong Domingo sa hapon ang takna samtang sila nanaygon.

Usa ka 8-anyos nga saksi nga manghud sa biktima mitumbok sa usa ka tiguwang lalaki nga itomon ang pamanit maoy misignit sa iyang maguwang.

Matod ni PO2 Godofredo Dumdum, desk officer sa Balamban Police dihang nahinabi sa Banat News nanaygon ang magsuon sa kabalayan daplin sa highway sa maong lugar. Gikatahong giduol sila sa suspek ug giagni nga pakuyogon aron didto manaygon sa ilahang dapit kay daghang mga balay didto ug dagko ang hinatagan ug tungod sa maong haylo nanguyog ang duha ug nanakay sa usa ka Calvo bus nga paingon sa siyudad sa Sugbo. Apan matod sa bata nga pag-abot nila sa barangay Buanoy nanganaog sila uban sa maong tawo ug didto gitagaan siya og P20  nga plite ug gipauna siya og pauli gipasakay sa jeep pasaheroan paingon balik sa ilaha.

Matud pa ni Dumdum nagdumili unta pagsugot ang 11-anyos nga paunahon og pauli ang iyang manghod apan wala mosugot ang tiguwang.

Kagahapong adlawa nagpa -blotter ang ginikanan sa biktima sa kapulisan ug gilusad dayon ang follow up operation sa mga tinugyanan sa Womens Desk ug hangtud ning pagbalita wala pa gyud igkita ang biktima. (BANAT NEWS)