Gipasanginlang nanglili og dalagang silingan napusilan sa papa patay

CEBU, Philippines -  Patay ang usa ka tawo nga gipusil sa amahan sa dalaga nga giingong iyang gilili diha sa sitio Upper Sampaguita, sa barangay Banilad, dakbayan sa Mandaue alas-6 pasado ang takna sa miaging Domingo sa gabii.

Ang namatay mao si Melvin Gonzales, 32, samtang ang suspetsado  mao si Dionvy Salem, 47, pulos nagpuyo sa maong dapit. Si SPO1 Renato Canja sa Presinto 4 sa Mandaue City Police Office (MCPO) nga nagbase sa barangay Casuntingan nga nahinabi sa Banat News miingon nga giaway sa iyang kapuyo ang biktima dihang nasayran nga nasakpan kini nga nanglili sa naligo sa banyo nga dalagang anak sa ilang silingan.

Matud pa ni Canja tungod sa kasuko sa biktima migawas kini sa ilang panimalay ug pipila ka gutlo ang nakalabay kalit lang milanog ang boto sa armas ug nagkaguliyang na ang mga tawo.

Ang biktima nga nakabaton og samad pinusilan sa iyang tiyan dali gitabang sa mga silingan ug dali nilang gidala ngadto sa Vicente Sotto Memorial Medical Center sa dakbayan sa Sugbo apan pipila ka gutlo nga pag-atiman sa mga doktor  nakabsan kini sa iyang gininhawa. 

Si Canja miingon nga positibo nga giila sa mga silingan ang suspetsado kinsa mitahan usab ngadto kanila apan ang armas nga kalibre .38 nga maoy gigamit sa pagpusil padayon pang gipangita.

Sa report sa Aksyon Bisaya sa News 5 kagahapon, giingong misulong ang biktima sa balay sa suspek nga nagbitbit og kutsilyo maong kini napusilan ug self defense ang nahitabo. (BANAT NEWS)