4 ka armadong tawo nasikop didto sa lungsod sa Tabuelan

CEBU, Philippines - Upat ka gitumbok nga armadong tawo nasikop sa kapolisan ug usa kanila naangol   human mosuway og sukol   sa kapolisan didto sa barangay San Vicente, lungsod sa Tabuelan sa miaging Martes sa buntag.

Ang mga nasikop mao sila si Demosthenes Ruelan Bacasmas, 41, molupyo sa maong lugar; Jesus Ramillete Villador, 40; Pablo Cuerbo Arriesgado, 32, ug Seares Palicti, 35, nga taga   barangay Pardo, dakbayan sa Sugbo kinsa giingong usa ka police asset. Sa pasiunang imbestigasyon sa kapolisan nasayran nga ang kapitan sa maong barangay nga si Julito Almonacin nakabantay nga adunay mga kadudahang tawo nga nagsuroysuroy sa ilang barangay niadto pang Domingo.

Apan gawas sa duha ka mga katingad-ang tawo,laing duha usab ang nadugang niadtong Martes sa buntag  

Diha-diha gisuta dayon sa kapitan sa barangay uban ang mga tanod ang duha ka bag-ong naabot sa ilang barangay  dihang kalit silang gipusil ni Bacasmas busa agi og panalipod sa iyang kinabuhi gipusil usab niya sa Bacasmas

Gumikan sa kaabtik nga gipakita sa mga tanod wala na makalihok ang kauban ni Bacasmas ug dihadiha gisikop silang upat.

Matud pa ni Almonacin nga   nasuta niya gikan sa iyang mga silingan nga ang upat dugay na nga nangita kaniya sa wala masayring rason.

Samtang mibutyag usab si Almonacin nga sa milabayang duha ka semana, nakadawat siya og tawag gikan sa wala hiilhing tawo ug nanghulga nga mawala na siya ning kalibutana.

Dako ang pagduda ni Almonacin nga ang maong hulga gikan sa upat ka armadong tawo

Sa habig usab sa mga suspetsado, si Villador mitug-an nga ‘planted’ lang ang tanang mga armas nga nakuha gikan kanila.

Misaysay si Villador nga ang tinuoray gayud nga nahitabo nga miadto lang sila sa maong lugar aron manari, samtang naglingkod sila sa usa ka lamesa gikatahong kalit lang sila nga giduol sa mga tanod ug sa walay igong hinungdan gigapos sila niini og pisi.

Nakuha gikan kang Bacasmas mao ang usa ka kalibre .45 nga adunay unom ka buhing bala, samtang kang Palicti mao ang kalibre .357 nga adunay unom usab ka buhing bala; nakuha gikan kang Villador mao ang usa ka kalibre .45 nga adunay unom usab ka buhing bala ug kang Arriesgado mao ang usa ka kalibre .357 nga adunay unom ka buhing bala, usa ka 9mm KG9 SMG nga adunay 23 ka buhing bala ug laing usa ka granada.

Dako ang pagtuo sa kapitan nga adunay dagkong politiko ang nagsugo sa upat ka armadong tawo nga motira kaniya sa wala pa usab niya masayring hinungdan.

Ang hepe sa kapolisan sa lalawigan sa Sugbo, Sr. Supt. Patrocinio Comendador mibutyag nga tanang anggulo ilang gitan-aw karon, gani aduna silay giprioridad nga anggulo susama sa politika, robbery, illegal drugs ug gun for hire.

Nakuha sab nga impormasyon ni Comendador mao nga si Bacasmas usa diay ka sakop sa City of Bogo Anti-Crime Task Force (CBACTAF) apan nataktak kini human magpositibo sa ginadiling drugas.

Laing impormasyon nga nakuha sa kapolisan mao nga si Palicti usa diay ka police asset sa Theft and Robbery Section (TRS) ug gani aktibo ba kini siyang maghatagan og impormasyon.

Mibutyag usab si Comendador nga niadtong tuig 2010 ang panimalay ni Almonacin gipaulanan og mga bala diin ila usab nga sutaon kun may kalambigitan pa ang maong hitabo karon sa nahitabo sa kapitan sa miaging tuig. (BANAT NEWS)