Mga sakyanan sa Cebu City Hall kibrahan og krudo

CEBU, Philippines - Sugod karong adlawa kibrahan na ngadto sa 50% ang fuel allocation alang sa liboan ka mga sakyanan nga gipanag-iya sa kagamhanan sa siyudad sa Sugbo gumikan kay nagnihit na ang budget niini. Sumala pa ni Mayor Michael Rama nga kinahanglang magdaginot ang mga empleyado sa City Hall sa paggamit sa gasolina sanglit nagpaabot pa sila sa pag-aprobar sa pagduso nila og supplemental budget sa konseho.

Ang pangulo sa General Services Office nga si Rolando Ardoza nagkanayon nga nagamit ang pundong reserba sa siyudad sa krudo (diesel) kutob na lang sunod buwan.

Nasayran nga ang mayor miduso og proposal alang sa ikaduhang supplemental budget og P20 milyones aron idugang sa gikinahanglang gasoline ug P15 milyones alang sa diesel fuel.

Gikataho nga ang dakbayan makagamit og 5,000 ngadto sa 6,000 ka litro nga diesel ug 1,200 ngadto sa 2,000 nga gasolina matag adlaw. Gawas sa mga sakyanan sa City Hall, ang siyudad usab maoy nagsuporta og gasolina sa mga sakyanan sa barangay ug mga sakyanan sa kapolisan.

Apan giklaro ni Ardoza nga dili maapektahan ang fuel allocation sa kapolisan ug sa mga trak sa basura tungod sa kadako sa ilang papel sa katilingban sama sa kahapsay ug kalinaw ug ang kalimpyo sa palibot nga ang maapektahan mao ang panglawas sa mga tawo.

Ang matag sakyanan adunay 300 litrong fuel allocation matag buwan apan mas dako ang fuel allocation alang sa mga sakyanan nga nagserbisyo sa mga bukirang barangay. ( /EIM) - BANAT NEWS